Enquisa PREME: a satisfacción cos edificios e instalacións bibliotecarias

Con obxecto de mellorar o sistema de recollida da opinión dos usuarios, a Biblioteca vén de reformular o proxecto de enquisas PREME que a partir de xaneiro pasou a basearse en preguntas de carácter bimestral.  Con iso redúcese o número de preguntas a contestar durante o ano polos usuarios e, sobre todo, amplíase o prazo de recollida coa finalidade de incrementar os niveis de resposta ata o de agora rexistrados.  Rematada a pregunta dos meses de xaneiro e febreiro (satisfacción cos horarios da Biblioteca), durante os meses de marzo e abril formulase unha pregunta sobre os edificios e instalacións das bibliotecas.

No ámbito dos edificios e instalacións, e con relación á situación anterior, tivo lugar unha novidade salientable como é a posta en servizo da nova biblioteca de Ciencias Experimentais, no campus Lagoas-Marcosende, que foi inaugurada a finais de 2009. Xunto a ela integran a rede bibliotecaria: as bibliotecas centrais de Vigo, Ourense e Pontevedra, e as bibliotecas de Torrecedeira en Vigo, a biblioteca de Belas Artes en Pontevedra, e as bibliotecas de Ciencias Xurídicas, de Económicas, de Filoloxía e Tradución, de Telecomunicación e de Industriais-Minas todas elas no campus Lagoas-Marcosende (Vigo).

Unha vez máis a Biblioteca anima aos seus usuarios e usuarias a responder a esta pregunta que estará dispoñible ata o próximo 30 de abril: Parécenlle satisfactorios os edificios das bibliotecas da UVigo (confort, amplitude, limpeza, postos de estudo)?