Día internacional do libro
Para conmemorar o Día Internacional do Libro, un grupo de bibliotecarias e bibliotecarios da Universidade de Vigo organiza, a partir do día 20 de abril na biblioteca central do campus Lagoas-Marcosende (Vigo), a segunda edición dunha iniciativa que, baixo o nome de "Guerrilla laneira", xa se desenvolveu na biblioteca no ano 2013…
A iniciativa, que consiste en cubrir con pezas de lá calcetada o mobiliario e outros elementos do edificio da biblioteca, basease no movemento de arte urbano coñecido como Yarnbombing, Yarnstorming, Guerrilla Knitting, Urban Knitting ou Graffiti Knitting que xurdiu en Holanda en 2004. Máis información sobre a "guerrilla laneira" en Facebook.
Ademais, entre as actividades previstas para este Día do Libro, a escritora María Reimóndez acudirá como invitada á biblioteca para desenvolver a charla "Conversas con María Reimóndez". O evento terá lugar o mércores 22 de abril ás 13 h. na biblioteca central do campus Lagoas-Marcosende (Vigo). Cómpre salientar que a súa obra está ampliamente representada na colección da Biblioteca Universitaria.
A conmemoración do Día do libro complétase cunha exposición bibliográfica baixo o título de "Tecedoras de historias" que é unha mostra de libros escritos por autoras galegas que estarán dispoñibles nos andeis da biblioteca central ata finais do vindeiro mes de maio.
