Rematado o mes de maio, corresponde lanzar unha nova pregunta da enquisa dixital PREME (uha pregunta ao mes) deseñada para intentar captar o grao de satisfacción dos usuarios cos servizos que presta a Biblioteca Universitaria. Nesta ocasión a pregunta refírese ás coleccións de materiais impresos (básicamente libros e revistas) que a Biblioteca poñe a disposición dos seus usuarios e usuarias.
Repartidas nas 11 bibliotecas que compoñen a Biblioteca da Universidade de Vigo, as coleccións impresas están formadas segundo os últimos datos oficialmente publicados por REBIUN de 519.349 volumes en 12.239 títulos de revistas en papel (datos a 31 de decembro de 2008). Xunto aos recursos electrónicos (revistas-e, bases de datos, libros-e), completan as coleccións impresas os ´materiais non librarios´ (mapas, fotografías, diapositivas, microformas...) e outros soportes como vídeos, CD-ROMs e DVDs. Dende a Dirección da Biblioteca anímase aos membros da comunidade universitaria e ao resto de usuarios a responder a esta sinxela enquisa: indique o seu grao de satisfacción coas coleccións de libros e revistas impresas da Biblioteca Universitaria.
Con respecto á enquisa do mes de maio, coa pregunta "está satisfeito/a cos servizos de préstamo interbibliotecario e obtención de documentos?", obtivéronse un total de 138 enquisas completadas sobre un total de 228 iniciadas. A media de satisfacción sitúase en 4,39 puntos sobre 5, cun 1% dos respondentes nada satisfeito, un 4% moi pouco, un 9% algo, un 25% bastante, un 54% moi satisfeito e un 8% de ´non sabe/non contesta´. Por sectores o maior número de persoas participantes na enquisa pertence ao PDI (56%), seguido do alumnado de 3º ciclo (17%), o alumnado de 1º e 2º ciclo (11%), o PAS (9%) e os usuarios externos (7%). Grazas a todos eles!.