Pregunta de febreiro da enquisa “PREME”: satisfacción co trato do persoal bibliotecario
Como vén sendo habitual, a Biblioteca Universitaria, unha vez finalizado o mes de xaneiro, lanza unha nova pregunta da súa enquisa de satisfacción PREME (unha pregunta ao mes). Nesta ocasión a pregunta correspondente ao mes de febreiro trata da satisfacción co trato e atención que os usuarios reciben por parte do persoal da Biblioteca Universitaria.
Imaxe: Jeff McNeill, tomada de Flickr: http://www.flickr.com/photos/jeffmcneill/2948062648/sizes/m
Desde hoxe 1 de febreiro, e ata o próximo día 28, está a disposición dos usuarios unha nova pregunta da enquisa de satisfacción cos servizos da Biblioteca. Ao longo deste mes a pregunta que se formula é: Está satisfeito/a co trato e atención que recibe do persoal da biblioteca?
No mes anterior, a pregunta sobre o grao de satisfacción cos edificios e instalacións bibliotecarias non obtivo o nivel desexable de resposta (unicamente recolléronse 87 enquisas) que non permiten unha mínima representatividade dos seus resultados. Non obstante, e a efectos meramente indicativos, pódese sinalar que a media de satisfacción cos edificios bibliotecarios das respostas recollidas sitúase en 3,66 puntos sobre 5, é dicir, a medio camiño entre "algo satisfeito" e "bastante satisfeito". Como en ocasións anteriores, a Biblioteca agradece vivamente a súa colaboración aos usuarios e usuarios que se brindaron a responder á enquisa de xaneiro, á vez que anima a todos os/as usuarios/as a participar máis activamente na enquisa do mes de febreiro.
