Nace blogdaBiblio, o blog de novas da Biblioteca da Universidade de Vigo

BlogdaBiblio nace como unha nova canle de comunicación da Biblioteca da Universidade de Vigo cos seus usuarios e, en xeral, co conxunto da comunidade universitaria. Con esta iniciativa, a Biblioteca comeza a súa andaina no ámbito da "biblioteca 2.0".

O blog pretende, por unha banda, manter regularmente informados aos nosos usuarios das novidades que se produzan en canto a novos recursos electrónicos, recursos web de interese, cambios nas normativas, modificacións de horarios, actos públicos, cursos e actividades de formación, etc.  Por outra banda blogdaBiblio tamén quere ser unha ferramenta de conversa con todos/as aqueles/as interesados no funcionamento da Biblioteca Universitaria.

O logo do blog resume o contexto de actuación das bibliotecas universitarias no século XXI: coleccións e conexións. Así, a silueta do libro (imaxe tradicionalmente asociada ás bibliotecas), está formada por unha liña que evoca un cable de rede que asegura a conectividade a internet e outras redes telemáticas. Enriba do libro aparece a árbore do escudo da Universidade de Vigo que tamén remite á metáfora cartesiana da "árbore do coñecemento".