A UVigo conmemora o Día do Libro LGTBIQA+ con arte e literatura nos tres campus
Para conmemorar o día do libro LGTBIQA+, a Unidade de Diversidade da Universidade de Vigo en colaboración coa Biblioteca Universitaria, organiza unha exposición bibliográfica do 6 ao 15 de abril nos campus de Ourense, Pontevedra e Vigo...
A través dunha selección bibliográfica a mostra persegue visibilizar as experiencias e realidades das persoas LGTBIQA+ para diminuír prexuízos, promover unha visión inclusiva da diversidade afectivo-sexual e de xénero e achegar coñecemento multidisciplinar vinculado ás teorías que estudan a diversidade. A exposición enmárcase tamén no compromiso institucional da UVigo cos Obxectivos de Desenvolvemento Sostible (ODS): o obxectivo 4 (Educación de calidade), promovendo unha formación inclusiva e crítica; o obxectivo 5 (Igualdade de xénero), combatendo as desigualdades do sistema sexo-xénero; o obxectivo 10 (Redución das desigualdades), visibilizando colectivos historicamente marxinados, e o obxectivo 16 (Paz, xustiza e institucións sólidas), fomentando espazos seguros e respectuosos.
A mostra, que terá lugar nas bibliotecas centrais de Vigo e Ourense e maila biblioteca de Belas Artes en Pontevedra, acompáñase de colaboracións especiais en diálogo coas exposicións bibliográficas dos fondos da Biblioteca Universitaria: a exposición fotográfica "Corpos e Rostros B" cedida pola Asociación Nós Mesmas na biblioteca central de Vigo e a mostra fotográfica "@XES: Propuestas artísticas para una nueva arquitectura social" na biblioteca central de Ourense.
