A Biblioteca Universitaria conmemora a Semana Internacional do Acceso Aberto 2021
Para conmemorar a Semana do Acceso Aberto deste ano 2021 (25 ao 31 de outubro), a Biblioteca Universitaria, en colaboración coa Vicerreitoría de Investigación, programou un seminario web, un obradoiro para o personal investigador e a publicación de senllos informes sobre o estado do acceso aberto na UVigo. Con estas iniciativas a Biblioteca súmase un ano máis ás celebracións da semana doutras universidades españolas e do resto do mundo...
O seminario, titulado Escalada cara aos datos de investigación en aberto, impartirase o vindeiro 28 de outubro por Remedios Melero, investigadora do IATA (Instituto de Agroquímica y Tecnología de Alimentos), do CSIC, e coordinadora do grupo de traballo español de Acceso Aberto á Ciencia . Pola súa banda, o obradoiro Pensa en verde!, sobre como depositar no repositorio Investigo, vai dirixido ao persoal investigador da UVigo co fin de fomentar o autoarquivo dos seus traballos no repositorio institucional Investigo. O obradoiro taller será impartido pola responsable do repositorio Carmen Barros. Por último, presentarase o informe As publicacións científicas da Universidade de Vigo en acceso aberto e o Boletín Impacto nº 11 tamén dedicado ás publicacións en aberto da UVigo. Máis información sobre o programa na sección de novas da web da UVigo e no DUVI.
