O número 9 do boletín Impacto vai dedicado aos centros de investigación da UVigo: atlanTTic, o Centro de Investigación Mariña, Cinbio e Cintecx. Estes centros están identificados en Web of Science (WoS) e en Scopus como institucións para que se poidan recuperar e analizar as súas publicacións de xeito independente ás do conxunto da universidade. Desde a Área de Bibliometría da Biblioteca Universitaria quixemos comprobar en que medida as publicacións destes centros están correctamente identificadas en WoS...
O resultado amosa que son moitos os artigos publicados por membros destes centros de investigación que non están identificados como tales en WoS. A causa é que as bases de datos bibliográficas identifican a filiación das publicacións a partir da sinatura científica dos seus autores/as, de xeito que WoS só pode asignar esa publicación a ese centro cando na sinatura aparece o seu nome. Neste sentido cómpre lembrar que, de acordo co Protocolo para a normalización da sinatura científica, o persoal dos centros de investigación ten que incluír tanto o nome do centro coma o da universidade cando asina publicacións científicas.