Nace ”Impacto” o boletín de información bibliométrica da Universidade de Vigo
A Biblioteca Universitaria presenta o seu novo boletín, Impacto: boletín de información bibliométrica da Universidade de Vigo. O número 0, publicado o 8 de marzo, está dedicado á bibliometría e á presenza da Universidade de Vigo en Google Académico desde unha perspectiva de xénero...
Este boletín pretende dar a coñecer ao persoal investigador e ao público en xeral datos bibliométricos relacionados coas publicacións científicas das persoas que forman parte da Universidade de Vigo. Foi elaborado pola nova Área de Servizos Bibliométricos que, presentada o pasado día 7 de marzo, ten como funcións:
- analizar a produción científica dos membros da Universidade de Vigo
- elaborar estudos e informes bibliométricos a solicitude doutras unidades da universidade
- elaborar informes bibliométricos como apoio á xestión bibliotecaria
- asesorar ao persoal investigador en materia de publicación e difusión científica.
A bibliometría é unha disciplina que, usando métodos matemáticos e estatísticos, aporta datos sobre diferentes aspectos da literatura científica. A bibliometría non substitúe, senón que complementa, a valoración da calidade das publicacións e da investigación, aportando información relacionada co impacto e a visibilidade das publicacións, a colaboración con outras institucións, o volume de publicacións, etc.
