Presentado o repositorio institucional de acceso aberto da Universidade de Vigo
Hoxe pola mañá foi presentado Investigo, o repositorio institucional de acceso aberto da Universidade de Vigo. A presentación, con presenza da Vicerreitora de Investigación e Transferencia e do Vicerreitor de Economía e Planificación, quedou a cargo do Director da Biblioteca Universitaria, Gerardo Marraud, quen na súa intervención trazou as liñas xerais do movemento do acceso aberto e fixo unha síntese da historia e alcance do proxecto do novo repositorio.
O repositorio, desenvolvido sobre o software libre DSpace, vai ser xestionado pola Biblioteca Universitaria e xorde para dar cumprimento ás disposicións sobre acceso aberto da Lei da Ciencia e do Real Decreto regulador das ensinanzas oficiais de doutoramento. Ademais, o repositorio vaise vincular ao proceso de rexistro e avaliación da produción científica na Universidade de Vigo. Deste xeito, trátase dun repositorio de investigación cuxo contido estará constituído por artigos de revistas científicas, libros e partes de libros, teses de doutoramento e comunicacións e relatorios presentados en congresos e reunións científicas.
Para articular a conexión do repositorio co rexistro da produción científica, a Biblioteca desenvolveu un sistema de autoarquivo chamado SAI3. Este sistema pretende, por unha banda, "poboar" dun xeito eficiente o repositorio e, por outra, enviar de forma automática os datos ao sistema de xestión da investigación (SUXI) para avaliar a produción científica do persoal investigador da universidade. Este sistema de autoarquivo baséase no reaproveitamento de datos de fontes externas e na súa conversión en metadatos Dublin Core. A partir dun tratamento intelixente dos datos e metadatos procedentes do protocolo Z39.50, do sistema CrossRef e das bases de datos de xestión da propia universidade, automatízase o seu envío grazas ao protocolo SWORD. Este sistema, inspirado na aplicación EasyDeposit desenvolvida por Stuart Lewis, minimiza o tempo requeirido para depositar un ítem no repositorio grazas a obtención automatizada da maioría dos metadatos desde fontes externas fiables como o catálogo da Biblioteca da Universidade de Vigo, os catálogos doutras bibliotecas científicas ou o sistema CrossRef. A todo isto engádese un conxunto de servizos web baixo Zend Framework que xera unha interface de usuario programada en Angular que proporciona gran velocidade de interacción e facilidade de uso.
