Conferencia Universidade 2.0: en busca da innovación educativa
O vindeiro 12 de maio, na Facultade de Ciencias da Comunicación da Universidade de Santiago de Compostela, vai ter lugar a 1ª Conferencia Universidade 2.0. A conferencia oriéntase a compartir experiencias e suscitar debates ao redor da aplicación das tecnoloxías 2.0 no ámbito da educación superior e conta coa participación das tres universidades galegas e das súas correspondentes bibliotecas integradas no comité organizador.
Como apunta o Presidente do Comité Organizador, o profesor Miguel Merino, da Universidade de Vigo, aínda que o uso das ferramentas e potencialidades da tecnoloxía 2.0 é habitual entre o profesorado e o alumnado universitario, o certo é que, por regra xeral, permanecen ausentes das políticas das institucións da educación superior. As prácticas de uso intensivo de medios sociais e de servizos de cloud computing con frecuencia entran en conflito coas plataformas tecnolóxicas das universidades baseadas en gran medida en sistemas pechados e centralizados. Esta situación invita a plantexarse a necesidade de introducir cambios por canto a cultura dixital e as novas políticas do Espazo Europeo de Educación Superior fan urxente desenvolver nas universidades galegas unha verdadeira cultura de innovación con modelos organizativos flexibles baseados na experimentación continua e o pensamento creativo. A Conferencia Universidade 2.0 expón estes debates cos mellores expertos mediante conferencias, mesas redondas e obradoiros os cales permitirannos ter unha visión máis práctica do uso destas tecnoloxías.
Pode atoparse máis información na web da conferencia, incluídos, entre outros, o programa da conferencia e o procedemento de inscrición na mesma.
